Supuṣpacandraparivartaḥ
Technical Details
supuṣpacandraparivartaḥ |
atha khalvāyuṣmānānanda utthāyāsanādekāṃsamuttarāsaṅgaṃ kṛtvā dakṣiṇaṃ jānumaṇḍalaṃ pṛthivyāṃ pratiṣṭhāpya yena bhagavāṃstenāñjaliṃ praṇamya bhagavantametadavocat-pṛccheyamahaṃ bhagavantaṃ tathāgatamarhantaṃ samyaksaṃbuddhaṃ kaṃcideva pradeśaṃ sacenme bhagavānavakāśaṃ kuryāt praṣṭavyapraśnavyākaraṇāya | evamukte bhagavānāyuṣmantamānandametadavocat-tena hyānanda svake āsane niṣadya pṛccha tvaṃ tathāgatamarhantaṃ samyaksaṃbuddhaṃ yad yadevākāṅkṣasi, ahaṃ te tasya tasya praśnasya vyākaraṇena cittamārādhayiṣye | evamukte āyuṣmānānando bhagavantametadavocat-kṛtāvakāśo'smi bhagavan, kṛtāvakāśo'smi sugata praśnavyākaraṇāya | atha khalvāyuṣmānānando bhagavataḥ purataḥ āsane niṣadya bhagavantametadavocat- ko nu bhagavan hetuḥ kaḥ pratyayo yadiha ekatyā bodhisattvā bodhisattvacārikāṃ caramāṇā hastacchedān pādacchedān karṇacchedānakṣyutpāṭanāni aṅgottamāṅgacchedān nigacchanti pratyaṅgacchedāṃśca ? vividhāni duḥkhāni pratyanubhavanti ? no ca hīyante ? na ca parikṣīyante'nuttarāyāḥ samyaksaṃbodheḥ ? evamukte bhagavānāyuṣmantamānandametadavocat-sacet tvamānanda jānīyā yāni me duḥkhāni pratyanubhūtāni imāmanuttarāṃ samyaksaṃbodhiṃ samudānayitum, etadapi te ca pratibhāyāt | kiṃ punaryattathāgataṃ paripraṣṭavyaṃ manyathāḥ | tad yathāpi nāma ānanda iha kāścideva puruṣaḥ adhastāt pādatalamupādāya yāvanmūrdhakādādīpto bhavet prajvalitaḥ ekajvālībhūtaḥ, taṃ kaścideva puruṣa upasaṃkramya evaṃ vadet-ehi tvaṃ bhoḥ puruṣa anirvāpitenātmabhāvena pañcabhiḥ kāmaguṇaiḥ samarpitaḥ samanvaṅgībhūtaḥ krīḍasva ramasva paricārayasveti | tat kiṃ manyase ānanda api tu sa puruṣaḥ anirvāpitenātmabhāvena pañcabhiḥ kāmaguṇaiḥ samarpitaḥ samanvaṅgībhūtaḥ krīḍeta rameta paricārayeta ? ānanda āha-no hīdaṃ bhagavan | bhagavānāha-krīḍetānanda sa puruṣo rameta paricārayeta parikalpamupādāyānirvāpitenātmabhāvena pañcabhiḥ kāmaguṇaiḥ samarpitaḥ samanvaṅgībhūtaḥ | na tveva tathāgatasya pūrvaṃ bodhisattvacārikāṃ caramāṇasya sattvāṃstribhirupāyairduḥkhitān dṛṣṭvā daridrānnābhūt sukhaṃ vā saumanasyaṃ vā cittapraharṣo vā | ye ānanda bodhisattvā mahāsattvāḥ pūrvaṃ bodhisattvacārikāṃ caramāṇā akhaṇḍaśīlā bhavanti achidraśīlāḥ akalmāṣaśīlā aśabalaśīlāḥ aparāmṛṣṭaśīlāḥ acalitaśīlāḥ, alulitaśīlā akopyaśīlāḥ, nottānaśīlāḥ, na paradarśanaśīlāḥ na visaṃvādaśīlāḥ, ṛjuśīlāḥ yathāpratijñāśīlāḥ sattvānugrahaśīlāḥ | evaṃrūpeṇa śīlena samanvāgatā bhavanti, te ānanda bodhisattvā mahāsattvā anantāṃ bodhisattvacārikāṃ caramāṇā na hastacchedena parihāṇiṃ nigacchanti | na pādacchedena parihāṇiṃ nigacchanti | na karṇanāsācchedena parihāṇiṃ nigacchanti | na netrotpāṭanaśīrṣacchedena parihāṇiṃ nigacchanti | nāṅgapratyaṅgacchedena parihāṇiṃ nigacchanti | na ca vividhāni duḥkhāni pratyanubhavanti | kṣipraṃ cānuttarāṃ samyaksaṃbodhimabhisaṃbudhyante ||
bhūtapūrvamānanda atīte'dhvanyasaṃkhyeyakalpairasaṃkhyeyatarairvipulairapramāṇairacintyairatulyairamāpyairaparimāṇairyadāsīt | tena kālena tena samayena ratnapadmacandraviśuddhābhyudgatarājo nāma tathāgato'rhan samyaksaṃbuddho loka udapādi vidyācaraṇasaṃpannaḥ sugato lokavidanuttaraḥ puruṣadamyasārathiḥ śāstā devamanuṣyāṇāṃ ca buddho bhagavān | tena khalu punarānanda samayena tasya bhagavato ratnapadmacandraviśuddhābhyudgatarājñastathāgatasyārhataḥ samyaksaṃbuddhasya navatikalpakoṭīniyutaśatasahasrāṇyāyuṣpramāṇamabhūt | sarvatra ca divase navatikalpakoṭīsahasrāṇi sattvānāmavaivartikatāyāṃ buddhadharmeṣu pratiṣṭhāpayati sma | tena khalu punarānanda samayena tasya bhagavato ratnapadmacandraviśuddhābhyudgatarājñastathāgatasyārhataḥ samyaksaṃbuddhasya parinirvṛtasya caramikāyāṃ pañcāśati saddharmāntardhānakālasamaye saddharmavipralope vartamāne ime evaṃrūpāḥ sūtrāntā bahujanajugupsitā bahujanavivarjitā bahujanaviruddhā mahājanotsṛṣṭāścābhūvan | mahābhayabhairavakāle vartamāne mahopadrave ativṛṣṭikālasamaye anāvṛṣṭikālasamaye vartamāne vyālakālasamaye vartamāne vidyutkāntārakalpasamaye durbhikṣakālasamaye mithyādṛṣṭikālasamaye asamyagdṛṣṭikālasamaye tīrthikamantraparyeṣṭikālasamaye buddhabodheḥ pralujyamānakālasamaye vartamāne sapta bodhisattvasahasrāṇi grāmanagaranigamarā rājadhānījanapadebhyo nirvāsitāni samantabhadraṃ nāma vanakhaṇḍaṃ tadupaniśritya viharanti sma sārdhaṃ supuṣpacandreṇa dharmabhāṇakena, yasteṣāṃ bhikṣūṇāṃ dhāraṇīdharmapayāya deśayati sma | sa khalu punā rājā supuṣpacandro dharmabhāṇaka eko rahogataḥ pratisaṃlīno divyena cakṣuṣā atikrāntamānuṣeṇa paśyati sma-bahvīrbodhisattvakoṭiravaruptakuśalamūlā anyonyebhyo buddhakṣetrebhyaḥ ihopapannāḥ | sacette labheran dhāraṇīdharmaparyāyaśravaṇāya, na nivarterannanuttarāyāḥ samyaksaṃbodheḥ | atha na labheran dhāraṇīdharmaparyāyaśravaṇāya, vivarterannanuttarāyāḥ samyaksaṃbodheḥ | atha khalu supuṣpacandro dharmabhāṇakaḥ smṛtaḥ saṃprajānaṃstataḥ samādhervyutthāya yenāsau mahān bodhisattvagaṇastenopasaṃkrāntaḥ upasaṃkramya taṃ mahāntaṃ bodhisattvagaṇametadavocat- gamiṣyāmaḥ kulaputrāḥ | grāmanagaranigamarāṣṭarājadhānīravataritvā sattvebhyo dharmaṃ deśayiṣyāmaḥ | atha khalu sa mahān bodhisattvagaṇaḥ supuṣpacandraṃ dharmabhāṇakametadavocat-nāsmākamabhipretaṃ yadāyuṣmānito vanaṣaṇḍād grāmanagaranigamarāṣṭrarājadhānīravataret | tatkasya hetoḥ ? bahvayo'bhimānikā bhikṣubhikṣuṇyupāsakopāsikāḥ| saddharmapratikṣepakālaśca vartate | tamāyuṣmantaṃ jīvitādvayavaropayiṣyanti | āyuṣmāṃścātīva prāsādiko'bhirūpo darśanīyaḥ prathamayauvanasamanvāgato bhadrake vayasi vartate | sa dhautakāñcanahāṭakacchaviḥ śaṅkhakundenduvarṇayorṇayā pratimaṇḍito'pi śobhitalalāṭo nīlakuñcitakeśoṇīṣaśca | mā te rājaputrā vā anye vā tatpratimā īrṣyāmātsaryopahacetaso jīvitādvayavaropayiṣyanti | atha khalu supuṣpacandro dharmabhāṇakastaṃ bodhisattvagaṇametadavocat-sacenme ātmā ārakṣyo bhavet, na mayā atītānāgatapratyutpannānāṃ buddhānāṃ bhagavatāṃ śāsane ārakṣā kṛtā bhavet | tasyāṃ ca velāyāmimā gāthā abhāṣata-
na ātmasaṃjñāya vasitva jātu
śakyaṃ ihā śāsani rakṣa kurvaṇā |
mahāvitānā sugatāna bodhiḥ
prakāśanā paścimi kāli dāruṇe || 1 ||
yo ātmasaṃjñā prajahitva sarvaśaḥ
sattvānimān pudgalavādaniśritān |
rūpāṇi śabdāṃśca rasāṃśca gandhān
spraṣṭavyu varjeti sa rakṣi śāsanam || 2 ||
buddhāna koṭīnayutānyupasthihe -
dannena pānena prasannacittaḥ |
chatraiḥ patākābhi dīpakriyābhiḥ
kalpāna koṭī yatha gaṅgavālikāḥ || 3 ||
yaścaiva saddharma pralujyamāne
nirudhyamāne sugatāna śāsane |
rātriṃdivaṃ eka careyya śiṣyān
idaṃ tataḥ puṇyu viśiṣṭu bhoti || 4 ||
ye dāni teṣāṃ puruṣarṣabhāṇāṃ
saddharmi lujyanti upekṣi bhāvayī |
na tairjinā satkṛta bhonti kecit
na co kṛtaṃ gauravu nāyakeṣu || 5 ||
yuṣme bhotha sukhī svakārthu kuruthā gopāyathā ātmanaṃ
yuṣme bhotha ihāpramatta vinaye maitrīvihārī sadā |
śīlaṃ rakṣatha ujjvalaṃ aśabalaṃ śuddhaṃ śuci nirmalaṃ
yehī rakṣitu śīlu bhoti amalaṃ buddhebhi saṃvarṇitam || 6 ||
yehī satkṛtu bhonti sarvi sugatā yāvanta pūrve abhūt
tehi trāyitu bhonti sarvajanatā yā bodhisaṃprasthitā |
tehī uddharitāḥ bhavanti narakā sattvā bahū pāpakāḥ
yehī rakṣitu bhonti śīlu amalaṃ buddhaiḥ praśastaṃ purā || 7 ||
dānaṃ detha viśiṣṭa dharmaratanaṃ kṣāntiṃ sadā rakṣathā-
raṇyaṃ cāśrayathā samādhikuśalā bhāvetha co mārdavam |
mā co vigraha sarvathā vicarathā śiṣṭāṃ śivāṃ cārikāṃ
gacchāmo vayu rājadhāni nagaraṃ sattvāna trāṇārthikāḥ || 8 ||
tasminnotaratī mahāmatidhare sattvāgrasāre ṛṣau
vartentī imi aśrukāḥ sukaruṇaṃ pādehi anye patī |
mā hī otarahī mahāmati vidu prekṣa vane pādapān
mañjugandha manoramān surucirānātmāna trāṇātmakaḥ || 9 ||
te'pī pūrva vināyakā daśabalāḥ śāntendriyāḥ sūratāḥ
gatvā kānani śailaśṛṅgaśikhare bodhādhigamyāṃ varām |
śreṣṭhāṃ cārika bodhihetu caritāste puṇyajñānāṃ varāḥ
teṣāṃ śikṣihi kānane nivasato mā gaccha tvaṃ suvrata || 10 ||
gātraṃ citritu lakṣaṇaiḥ suruciraiḥ keśāśca nīlāstavā
varṇaḥ kāñcanasaṃnibhaprabhakaro obhāsate medinīm |
ūrṇā te bhramukhāntare surucirā śaṅkhanikāśaprabhā
mā te īrṣyu janitva kāyu vikirī rājānurāje tathā || 11 ||
atha khalvānanda supuṣpacandro dharmabhāṇakastaṃ bodhisattvagaṇaṃ gāthayābhyabhāṣata-
yāvantaḥ parimeṇa āsi sugatāḥ sarvajña kṣīṇāsravāḥ
sarve te'tha kariṃsu loki tribhave bodhādhigamyāṃ varām |
śreṣṭhāṃ cārika bodhihetu caritāste puṇyajñānāṃ varāḥ
teṣāṃ śikṣaya bodhisatva niyutā sattvāna trāṇārthikaḥ || 12 ||
sarve kṛtva pradakṣiṇaṃ ṛṣividuṃ pādāni vanditvanā
ghoraṃ āśvasato svananti karuṇaṃ krandanta ārtasvaram |
anye chinna prapāta medini patī mūrcchitva sālo yathā
no cā te parivarti puṇyanicitaḥ sattvārthakāmo ṛṣiḥ || 13 ||
pātraṃ cīvaru gṛhya prasthitu ṛṣī siṃho yathā kesarī
no cāsyo guṇadoṣa tatra akarī dharmasvabhāve sthitaḥ |
ghane kānani asmi loki vasataḥ sattvā apāye pati
so'bhūttaṃ nagaraṃ gamī puravaraṃ sattvānaṃ trāṇārthikaḥ || 14 ||
atha khalu supuṣpacandro dharmabhāṇako grāmanagaranigamarāṣṭarājadhānīravataritvā sattvānāṃ dharmaṃ deśayati sma | tena pūrvāhṇe avataritvā sattvānāṃ navanavati prāṇikoṭyaḥ avaivartiṃkatāyāṃ sthāpitāḥ anuttarāyāṃ samyaksaṃbodhau | na ca tāṃ ratnāvatīṃ rājadhānīmanuprāptaḥ | so'nupūrveṇa tāṃ ratnāvatīṃ rājadhānīmanuprāptaḥ | sa tasyāṃ ratnāvatyāṃ rājadhānyāmupasaṃkramitvā anyatarasmin plakṣasālamūle vyahārṣīt | sa tasyā rātryā atyayena tāṃ ratnāvatīṃ rājadhānīṃ prāviśat | praviśya ṣaṭatriṃśatprāṇikoṭīravaivartikatve sthāpayati buddhadharmeṣu | na ca tāvad bhaktakṛtyamakārṣīt | sa bhaktacchedacchinno ratnāvatyā rājadhānyā niṣkramya yena bhagavato nakhastūpastenopasaṃkramya āsthitaka eva rātriṃdivamatināmayati sma | sa tasyā rātryā atyayena dvitīye prāgbhakte ratnāvatīṃ rājadhānīṃ praviśya trayoviṃśatiprāṇikoṭīravaivartikabuddhadharmeṣu pratiṣṭhāpayati sma | na ca tāvad bhaktakṛtyamakārṣīt | sa dvitīyabhaktacchedacchinno ratnāvatyā rājadhānyā niṣkramya yena bhagavato nakhastūpastenopasaṃkramya utthitaka eva rātriṃdivamatināmayati sma | sa tasyāṃ rātryāmatītāyāṃ trirātrabhaktacchedacchinno ratnāvatīṃ rājadhānīṃ praviśya navanavatiprāṇikoṭīśatasahasrāṇyavaivartikabuddhadharmeṣu pratiṣṭhāpayati sma | na ca tāvad bhaktakṛtyamakārṣīt | sa trirātrabhaktacchedacchinno ratnāvatyā rājadhānyā niṣkramya yena bhagavato nakhastūpastenopasaṃkramya utthitaka eva tṛtīyaṃ rātriṃdivamatināmayati sma | sa tasyā rātryā atyayena caturthe prāgbhakte ratnāvatīṃ rājadhānīṃ praviśya navanavatiprāṇiśatasahasrāṇyavaivartikabuddhadharmeṣu pratiṣṭhāpayati | sa caturdivasabhaktacchedacchinno ratnāvatyā rājadhānyā niṣkramya yena bhagavato nakhastūpastenopasaṃkramya utthitaka eva rātriṃdivamatināmayati sma | sa tasyā rātryā atyayena pañcame divase ratnāvatīṃ rājadhānīṃ praviśya rājño'ntaḥpuraṃ prāviśat | pravisya cāśītiṃ strīsahasrāṇyavaivartikatve'nuttarāyāṃ samaksaṃbodhau pratiṣṭhāpayati sma | tasmācca nagarāt sarvasattvānavaivartikatāyāṃ sthāpayati buddhadharmeṣu | sa tasyā rātryā atyayena ṣaṣṭhe prāgbhakte ratnāvatīṃ rājadhānīṃ praviśya sahasraṃ rājaputrāṇāmavaivartikatve sthāpayati sma anuttarāyāṃ samyaksaṃbodhau | na ca tāvad bhaktasya kṛtyaṃ karoti sma | sa ṣaṣṭhe bhaktacchedacchinno ratnāvatyā rājadhānyā niṣkramya yena bhagavato nakhastūpastenopasaṃkramya rātriṃdivamatināmayati sma | sa tasya rātryā atyayena saptame purobhakte ratnāvatīṃ rājadhānīṃ praviśyādrākṣīcchūradattaṃ rājānamudyānamabhiniṣkramantaṃ suvarṇamayena rathena rūpyamayaiḥ pakṣabhiruragasāracandanamayyā īṣayā vaidūryamayaiścakraiḥ ucchritacchatradhvajasamalaṃkṛtena īṣāpaṭṭāvanaddhena dūṣyapaṭṭasaṃchāditena yatrāṣṭau śatāni kumārīṇāṃ ratnasūtraparigṛhītānām, yāstaṃ rathaṃ vāhayanti abhirūpāḥ prāsādikā darśanīyāḥ paramayā śubhravarṇapuṣkalatayā samanvāgatāḥ pritikārye audvilyakārye bālānāṃ na piṇḍatānām | caturaśītikṣatriyamahāśālakulasahasrāṇi pṛṣṭhataḥ samanubaddhānyabhūvan | caturaśītibrāhmaṇamahāśālasahasrāṇi caturaśītigṛhapatimahāśālasahasrāṇi pṛṣṭhataḥ pṛṣṭhato'nubaddhānyabhūvan | pañca ca duhitṛśatāni ratnamayīśibikābhirūḍhāḥ purato niryānti sma | tāḥ sahadarśanenaiva tasya bhikṣoravaivartikā abhūvannanuttarāyāṃ samyaksaṃbodhau | aṣṭaṣaṣṭiścāntaḥpurikāśatasahasrāṇi sahadarśanenaiva tasya bhikṣuravaivartikānyabhūvannanuttarāyāṃ samyaksaṃbodhau | sa ca mahājanakāyo maṇikuṇḍalānyapanīya pādukāścāpanīya ekāṃsaṃ cīvaraṃ prāvṛtya dakṣiṇaṃ jānumaṇḍalaṃ pṛthivyāṃ pratiṣṭhāpya yena sa bhikṣustenāñjaliṃ praṇamya namasyamānaḥ sthito'bhūt | atha khalu tā api kumārthaḥ pūrvakaiḥ kuśalamūlaiḥ saṃcoditāḥ samānāstābhyaḥ śibikābhyo'vataritvā ekāṃsaṃ cīvaraṃ prāvṛtya dakṣiṇaṃ jānumaṇḍalaṃ pṛthivyāṃ pratiṣṭhāpya yena sa bhi stenāñjāla praṇamya gāthābhiradhyabhāṣanta -
avabhāsitamadyaivaṃ raviṇeva samantataḥ |
bhikṣuṇā praviśantena janakāyaśca dhiṣṭhitaḥ || 15 ||
rāgadoṣāḥ samucchinnā mohāśca vidhamīkṛtāḥ |
krodho doṣaśca īrṣyā ca sarvaṃ chinnaṃ tadantaram || 16 ||
na rājaṃ prekṣate kaścinnaṃ caivamanuyātyasau |
yo rājñaḥ śūradattasya parivāraḥ sutādikaḥ || 17 ||
pūrṇamāsyāṃ yathā candro nakṣatraparivāritaḥ |
evaṃ sa śobhate bhikṣū rājaputrapuraskṛtaḥ || 18 ||
svarṇabimbaṃ yathā citraṃ kuśalebhiḥ sucitritam |
puṣpitaḥ sālarājo vā emeva bhikṣu śobhate || 19 ||
śakraśca devendra mahānubhāvaḥ
sahasranetrādhipatiḥ puraṃdaraḥ |
sumerumūrdhni tridaśāna īśvaro
emeva bhikṣuḥ praviśatu śobhate'yam || 20 ||
brahmeva manye pratiṣṭhitu brahmaloke
sunirmito vādhipati devaputraḥ |
suyāmu devo yathariva kāmadhātau
emeva bhikṣuḥ praviśatu śobhate'yam || 21 ||
sūryo vā manye pratapati antarīkṣe
sahasraraśmirvidhamiya andhakāram |
obhāsayanto samu diśatā samantād
emeva bhikṣuḥ praviśatu śobhate'yam || 22 ||
dānaṃ daditvā suvipula nantakalpān
rakṣitva śīlaṃ aśabalu nityakālam |
bhāvetva kṣāntimasadṛśa sarvaloke
so lakṣaṇebhiḥ parivṛtu eva śobhī || 23 ||
janayitva vīryaṃ ariyajanapraśastaṃ
sevitva dhyānā caturi alīnacittaḥ |
utpādya prajñāṃ nihaniya kleśajālaṃ
tenaiṣa bhikṣuḥ pratapati sarvaloke || 24 ||
ye buddhavīrā asadṛśa sattvasārāḥ
samatīta śūrā vikiriya dharmaśreṣṭhān |
ye'nāgate'dhve tathariva pratyutpanne
tenaiṣa putro vaśagānu dharmarājñaḥ || 25 ||
mā te anityaṃ bhavatu kadāci bhikṣo
yadrapataivaṃ pratapasi sarvaloke |
saṃpaśya tejo surucira śabdaghoṣo
rājāna tejo na tapati suṣṭhu bhūyaḥ || 26 ||
dharmo yathāyaṃ adhigatu ātmanā te
buddhānujñāto vicarasi sarvaloke |
emeva sarve vijahita istribhāvaṃ
sarve'pi yāmo yathariva eṣa bhikṣuḥ || 27 ||
te añjalīyo daśanakha kṛtva sarve
bhāṣitva gāthāḥ kṣipiṃsu pilandhanāni |
sauvarṇamālā tathapi ca muktahārā-
navataṃsakāni tathapi ca karṇaniṣkān || 28 ||
rājā vai yatha cakravarti balavān sarvān vipaśyī mahī
putrasaṃjña upasthapeti vicaran dvīpāni catvārime |
śreṣṭhī kṣatriya brāhmaṇāṃ gṛhapatī ye koṭṭarājā svakā
no teṣāmatireku sneha janayī sarveṣu premaṃ samam || 29 ||
evaṃ śikṣita dhāraṇīvaśagato bhikṣū ayaṃ sūrato
bodhyaṅgā bala indriyān bibhajati mārgaṃ ca aṣṭāṅgikam |
candro vā yatha rātriye pratapati tārāgaṇairmadhyago
sūryaśco yatha maṇḍalaṃ pratapate vairocanastejavān || 30 ||
sarvān buddhānnamasyāmo daśabalān śāntendriyān sūratān
yeṣāṃ varṇanu kaścidutsahi naro kalpāśataiḥ kṣepitum |
kalpā koṭisahasra bhāṣitu bahūn no ced guṇā kṣepituṃ
no co varṇa kṣipeya lokapravare ekasya romasya hi || 31 ||
yeno cakra pravartitaṃ asadṛśaṃ jñānopadaṃ deśitaṃ
nipuṇaṃ dharma prabhāṣitasya virajaṃ no cāsya dṛśyaṃ kvacit |
śramaṇābrāhmaṇadevānāga asuraurmāraiḥ sabrahmādibhi-
rno śakto guṇaārṇavaḥ prakathituṃ buddhasya sarvajñinaḥ || 32 ||
vandāmo jinavaidyarājamasamaṃ yasyedṛśā aurasāḥ
bhāṣitvā imi gātha sarvi muditā rājñaḥ kumāryastadā |
svarṇaṃ kāñcanacūrṇakāṃśca prakirī cailāni ca prastarī
cūḍānāṃ ca maṇīn sahārarucirā koṭīśatāmūlikā
taṃ bhikṣuṃ abhichādayitva muditā bodhāya saṃprasthitāḥ || 33 ||
atha khalu rājñaḥ śūradattasyaitadabhavat-vipratipannaṃ batedamantaḥpuraṃ janakāyaśca vyutthitaḥ | sa ca jano maṇikuṇḍalānyapanīya ekāṃsaṃ cīvaramāvṛtya dakṣiṇaṃ jānumaṇḍalaṃ pṛthivyāṃ pratiṣṭhāpya yena sa bhikṣustenāñjaliṃ praṇamya namasyati sma | sa ca rājā śūradattastāvat prāsādiko'bhūt tāvaddarśanīyo na ca tāvadabhirūpo yāvadabhirūpaḥ sa bhikṣuḥ | sa rājyahetoruttrasto'bhūt | rūpakāyapariniṣpattiṃ ca tasya bhikṣodṛṣṭvā atīva roṣamakārṣīt | tasya ca bhikṣo rājamārgasthasya rājñaścakṣurbhyāṃ praviṣṭaḥ | tasyaitadabhavat-saṃraktacittenaitena bhikṣuṇā mamāntaḥpuraḥ dṛṣṭam | akṣibhyāṃ cānena saṃketaḥ kṛtaḥ | tasyaitadabhavat-ka idānīmimaṃ bhikṣuṃ jīvitād vyavaropayiṣyatīti | atha rājñaḥ śūradattasyaḥ pṛṣṭhataḥ putrasahasramanubaddhamabhūt | sa tānāmantrayati sma-vyavaropayadhvaṃ kumārā etaṃ bhikṣuṃ jīvitāditi ||
atha khalu te kumārā rājñaḥ śūradattasya prativahanti sma tasya bhikṣoḥ kṛtaśaḥ | tasyaitadabhavat-putrā api me ājñāṃ na kurvanti | eka evāhaṃ sthāpitaḥ advitīyaḥ | ka idānīmimaṃ bhikṣuṃ jīvitādvayavaropayiṣyati ? atha rājñaḥ śūradattasya nandiko nāma vadhyaghātako'bhūt caṇḍaḥ sāhasiko raudraḥ | atha rājā śūradattastuṣṭa udagraḥ āttamanāḥ evaṃ cintayāmāsa-ayaṃ nandika etaṃ bhikṣuṃ jīvitādvayavaropayiṣyati | atha khalu nandiko vadhyaghātako yena rājā śūradattastenopasaṃkrāmat | atha khalu rājā śūradattastamāha-śakṣyasi tvaṃ nandika etaṃ bhikṣuṃ jīvitādvayavaropayitum ? mahāntaṃ te'bhicchādaṃ dāsyāmi | nandika āha-suṣṭhu deva, yathājñāpayasi | adyainaṃ bhikṣuṃ jīvitādvayavaropayiṣyāmi | tena hi nandika yasyedānīṃ kālaṃ manyase | tīkṣṇamasiṃ gṛhītvā etaṃ bhikṣorhastapādaṃ chinda | karṇanāsāṃ chinda | anena me saṃraktacittenāntaḥpuraṃ prekṣitam | ato'sya saṃdaṃśenākṣiṇī utpāṭaya | atha nandikena vadhyaghātakena tasyāmena velāyāṃ tīkṣṇamasiṃ gṛhītvā bhikṣohastapādāśchinnā akṣiṇī cotpāṭite | tato'sau mahān janakāyo rudan krandan paridevamānaḥ punarapi ratnāvatīṃ rājadhānīṃ praviṣṭaḥ ||
atha khalu rājā śūradattaḥ saptāhasyātyayādudyānagato na ramate na krīḍati na paricārayati | sa udyānānnivṛttaḥ saptāhasyātyayena ratnāvatīṃ rājadhānīṃ prāviśat | so'drākṣīttaṃ bhikṣuṃ rājamārge choritaṃ saptāhamṛtakaṃ avivarṇaśarīram | tasyaitadabhūt-yathāyaṃ bhikṣuravivarṇaśarīraḥ, niḥsaṃśayameṣa bhikṣuravaivartiko bhaviṣyatyanuttarāyāṃ samyaksaṃbodhau | pāpaṃ mayā karma kṛtaṃ mahānagarakasaṃvartanīyam | kṣiprameva mayā mahāniraye pratipattavyaṃ bhaviṣyati | tasyaivaṃ cintayataḥ uparyantarīkṣe caturaśītibhirdevaputrasahasrairekarutasvaraghoṣaśabdamudīritam-evametanmahārāja yathā vadasi | avaivartika eṣa bhikṣuranuttarāyāṃ samyaksaṃbodhau | tasya tāvad bhūyasyā mātrayā bhayaṃ ca trāsaṃ ca stambhitatvaṃ ca romaharṣaścotpanno vipratisāraścābhūt | atha rājā śūradatto duḥkhito durmanā vipratisārī tasyāṃ velāyāmimā gāthā abhāṣata -
rājyaṃ tyajiṣye tathapi ca rājadhānīṃ
hiraṇya suvarṇaṃ tatha maṇimukta ratnān |
ghāteyamātmā svaya śastra gṛhya
nihīnakarmāsmiha bālabuddhiḥ || 34 ||
supuṣpacandro'yamiha bhikṣurāsīd
dvātriṃśatā kavacitu lakṣaṇebhiḥ |
obhāsayanto praviśati rājadhānīṃ
nakṣatrarājo yathariva pūrṇamāsyām || 35 ||
ahaṃ ca hīnaḥ pralulitu kāmabhoge
nārīgaṇenā pramuditu niṣkramāmi |
rathābhirūḍhaḥ parivṛtu kṣatriyebhiḥ
ayaṃ ca etī surabhi sunetra bhikṣuḥ || 36 ||
taṃ dṛṣṭva bhikṣuṃ pramuditu nārisaṃgho
sauvarṇamālānavasiri premajātā |
sarve gṛhītvā daśanakhu añjalīyo
gāthābhigītaistamabhistaviṃsu bhikṣum || 37 ||
te gītaśabdāḥ praśamita sarvi rājñaḥ
sa rathābhirūḍhaḥ parivṛtu kṣatriyebhiḥ |
ayaṃ ca etī surabhi sunetro bhikṣu-
rmahānubhāvaḥ sugatavarasya putraḥ || 38 ||
mama caiva cittaṃ parama nihīnu māsī-
dīrṣyāṃ ca krodhaṃ ca tatra janemi mūḍhaḥ |
muditaṃ viditva suvipula nārisaṃgho
ālokya bhikṣuṃ praviśatu rājadhānim || 39 ||
atighorarūpā ahu giri bhāṣi tatra
putrasahasraṃ bhaṇami tatkṣaṇasmin |
gatvāna bhikṣuṃ prakuruta khaṇḍakhaṇḍā-
meṣo hi mahyaṃ parama amitra ghoraḥ || 40 ||
te kumāra sarve paramasuśīlavanto
svahitaiṣicittā abhirata yena bhikṣuḥ |
āṇatti devā na kariya evarūpā
śokābhibhūto ahamabhu tasmi kāle || 41 ||
imu bhikṣu dṛṣṭvā parama suśīlavantaṃ
maitryā upetaṃ pitaramiva pravṛttam |
sudṛṣṭacitto avasari ghātanārthaṃ
patito avīcau ahu paścakāle || 42 ||
yannandiko'yaṃ iha sthitu rājamārge
atiraudrakarmā dukhakaru mānuṣāṇām |
āṇatti tenā mama kṛta evarūpā
mālāguṇo vā ayamiha chinna bhikṣuḥ || 43 ||
samantabhadre vanavari premaṇīye
dvijābhikīrṇe kusumitamañjugandhe |
so cāpi anyaḥ suvipula bhikṣusaṃgho
mātrā vihīno yathariva ekaputrakaḥ || 44 ||
uttiṣṭha bhikṣo prativasa kānanasmin
kṛto te arthaḥ suvipula mānuṣāṇām |
yadrājadhānīmimu tada āgato'si
eṣyanti bhikṣu sukaruṇa krandamānāḥ || 45 ||
puṣpadhvajāni ima kṛta dakṣiṇenā
vāmena anye surucira darśanīyāḥ |
prajñapta mārgaḥ sphuṭa kṛta cīvarebhi
uttiṣṭha bhikṣo pratibhaṇa dharma śreṣṭham || 46 ||
cirapraviṣṭo tuhu iha rājadhānyā-
meṣyanti bhikṣu sukaruṇu krandamānāḥ |
mā antarāyo bhava siya jīvitasya
pralopakāle jinavaraśāsanasmin || 47 ||
yathaiva kaścita puruṣa mahānubhāvo
dikṣu vidikṣu satatu vighuṣṭaśabdaḥ |
mahāprapātaṃ prapatati vasuṃdharāyāṃ
sarvābhibhūya tribhavamimaṃ samantāt || 48 ||
emeva bhikṣuriha patito dharaṇyāṃ
surūparūpo bhūṣitu lakṣaṇairvaraiḥ |
adoṣaduṣṭo maya kṛta pāpabuddhinā
supuṣpacandro tiṣṭhati khaṇḍakhaṇḍaḥ || 49 ||
bhikṣu iho duḥkhahata sarva eva
aprītijātāstathapi ca śalyacittāḥ |
bheṣyanti kṣipraṃ dṛṣṭvimu dharmabhāṇakaṃ
supuṣpacandraṃ hatu patitaṃ pṛthivyām || 50 ||
supuṣpacandro yathariva śailarājo
dvātriṃśatībhiḥ kavacitu lakṣaṇebhiḥ |
mālāguṇeva pramadagaṇena gṛhya
kṣaṇe vikīrṇaṃ kṛtu khaṇḍakhaṇḍam || 51 ||
kṛtasmi karmaṃ parama sughorarūpam
avīci gamiṣye yamaviṣayamanātho |
buddhāna bheṣye parama sudūradūre
sa bhikṣuḥ kṛtu iha khaṇḍakhaṇḍam || 52 ||
na putra trāṇa na pi mama jñātisaṃgho
no cāsya mānyā na ca bhaṭapādamūlikāḥ |
meṣyanti trāṇaṃ narakagatasya mahyaṃ
svayaṃ karitva parama nihīnakarma || 53 ||
ye'tīta buddhāstathapi ca ye anāgatā-
stiṣṭhanti ye co daśasu diśāsu kecit |
te sārthavāhā daśabalā niṣkileśāḥ
śaraṇaṃ upaimī vajraghana ātmabhāvān || 54 ||
dṛṣṭvān bhikṣuṃ kṛtu iha khaṇḍakhaṇḍaṃ
krośaḥ pramuktaḥ sukaruṇa devatābhiḥ |
gatvāna te ārocayi bhikṣusaṃghe
supuṣpacandro itu iha rājyadhānyām || 55 ||
yo'sau vidu paṇḍitu dharmabhāṇako
mahānubhāvo diśividiśāsu ghuṣṭaḥ |
so bodhisattvo pratiṣṭhitu dhāraṇīye
supuṣpacandro hatu iha rājadhānyām || 56 ||
yo deti dānaṃ vividhamanantakalpān
yo śīla rakṣatyaśabalamasaṃpravedhim |
yo bhāvi kṣāntīmasadṛśa sarvaloke
supuṣpacandro hatu iha rājadhānyām || 57 ||
yo vīryavantaḥ satatamanantakalpān
yo dhyānu dhyāyī caturi alīnacitaḥ |
yaḥ prajña bhāveti kileśaghātakīṃ
supuṣpacandro hatu iha rājadhāniye || 58 ||
yaḥ kāyapremaṃ vijahitva sarvaśo'
napekṣa bhūtvā tatha jīvitāto |
samantabhadrādvanatotaritvā
supuṣpacandro hatu iha rājadhāniye || 59 ||
te rājadhānīṃ praviśitva sūratā
ārtasvaraṃ krandiṣu ghorarūpam |
dṛṣṭvān bhikṣuṃ kṛtu iha khaṇḍakhaṇḍaṃ
mūrcchitva sarve prapatita te dharaṇyām || 60 ||
rājāna taṃ so avaciṣu bhikṣusaṃgho
kimāparāddhaṃ tava deva bhikṣuṇā |
acchidaśīlena susaṃvṛtena
yaḥ pūrvajātiṃ smarate acintiyām || 61 ||
eṣo vaśī dhāraṇijñānapārago
eṣa prajānātiha śūnya saṃskṛtam |
eṣo'nimittaṃ jagato nidarśayī
praṇidhānasaṃjñāṃ iti sarva varjayī || 62 ||
eṣo muñci manojña ghoṣa ruciraṃ śāntendriyaḥ sūrato
eṣo pūrvanivāsapāramigato lokasya abhyudgataḥ |
eṣo buddha svayaṃbhu jñānavṛṣayo lokasya citrīkṛtaḥ
śuddhā cakṣuṣa prekṣiṣū vitimiro atyartha-maitrī-kṛpaḥ || 63 ||
kāmā hīna jaghanya duḥkhajananāḥ svargasya nirnāśakāḥ
kāmān sevatu bhonti śrotravikalāḥ prajñāvihīnā narāḥ |
kāmān sevatu andhu bhoti manujo mātāpita ghātayī
kāmān sevatu śīlavantu vadhayī tasmādvivarjennaro || 64 ||
kāmān sevatu rāja pārthivavarā varjetva ṛddhimimāṃ
ghorān gacchati karkaśān dukhakarānnarakān bhayānantakān |
pāpaṃ karma karoti īdṛśa viduṃ bhikṣuṃ vadhetī sadā
tasmāt pāpu vivarjitavyu vividhaṃ yo icchi bodhiṃ śivām || 65 ||
rūpāṇi śabdān rasa tatha gandha śreṣṭhān
spraṣṭavyadharmān tyajati alīnacittaḥ |
kāyaṃ viditva yathariva māya tucchaṃ
cakṣuṃ ca śrotraṃ tathariva ghrāṇa jihvam || 66 ||
dāne śikṣitu śīli apratisamaḥ kṣāntiṃ ca vīryaṃ tathā
dhyānaṃ sevatu prajñapāramigataḥ sattvāna arthakaraḥ |
lokaḥ sarvu sadevakaḥ samanujaḥ prekṣanti maitryā jinaṃ
teno cakṣu mahāndhakāragahane budhyanti bodhiṃ śivām || 67 ||
hastī aśvarathāṃstyajanti muditā aṅgālamañcāṃstathā
śibikāṃ dollikayugyayānavṛṣabhān grāmāṇi rāṣṭrāṇi ca |
nagaraṃ rājya tyajitva svarṇasphaṭikāṃ rūpyaṃ pravālāṃstathā
bhāryāpriyaputradhīrasvaśirāstyajitvā bodhiprasthitāḥ || 68 ||
pūjāṃ co atulāṃ karonti muditāḥ puṣpebhi gandhebhi co
gṛhya cchatradhvajā patāka vividhā saṃgītibhāṇḍāni ca |
no cāpī abhinandiṣu bhavagatiṃ jñātvāna śūnyān bhavān
teno lakṣaṇacitritā daśabalā bhāsanti sarvā diśaḥ || 69 ||
na kāmadhātau na ca rūpadhātā-
vārūpyadhātau ca na te niviṣṭāḥ |
traidhātukaṃ nābhiniviṣṭadharmā
ye bodhisattvāḥ pratiṣṭhitu dhāraṇīye || 70 ||
no ātmasaṃjñā na ca puna sattvasaṃjñā
no jīvasaṃjñā pudgalasaṃjña nāpi |
nityaṃ carantā aśabalu brahmacaryaṃ
ye bodhisattvāḥ pratiṣṭhitu dhāraṇīye || 71 ||
na bhāvasaṃjñā na ca punarabhāvasaṃjñā
na kṣemasaṃjñā na punarakṣemasaṃjñā |
no saukhyasaṃjñā na punarasaukhyasaṃjñā
ye bodhisattvāḥ pratiṣṭhitu dhāraṇīye || 72 ||
no astisaṃjñā na punarnāstisaṃjñā
no istrisaṃjñā na punaḥ puruṣasaṃjñā |
na grāmasaṃjñā na ca nagareṣu saṃjñā
no rāṣṭrasaṃjñā na pi nigameṣu saṃjñā || 73 ||
no rāgasaṃjñā na puna virāgasaṃjñā
no doṣasaṃjñā na punaradoṣasaṃjñā |
no mohasaṃjñā na punaramohasaṃjñā
ye bodhisattvāḥ pratiṣṭhitu dhāraṇīye || 74 ||
no indriyebhirna puna te balebhi-
rbodhyaṅgadhyāne na ca puna te niviṣṭāḥ |
traidhātuke te pravijahi doṣa sarva
ye bodhisattvāḥ pratiṣṭhitu dhāraṇīye || 75 ||
no rāgaraktā na ca puna doṣaduṣṭā
no mohamūḍhā aśaṭha bhavanti nityam |
dṛṣṭvā ca buddhā daśabala satkaronti
no cāpi svargaṃ matidhara prārthayanti || 76 ||
teṣāṃ śrutvā parata viśiṣṭadharmaṃ
no bhuya tasmin bhavati kadāci kāṅkṣā |
tailasya pātraṃ yathariva accha śuddhaṃ
chedācchedaṃ paramata tebhi jñātam || 77 ||
snehaṃ kurvatu jāyate anunayaḥ so'pī kileśo mahān
doṣaṃ kurvatu jāyate'sya pratigho vairaṃ bhayaṃ pāpakam |
dvāvetau vijahitvanā matigharā bodhāya ye prasthitāḥ
te bhontīha nararṣabhā daśabalā loke samabhyudgatāḥ || 78 ||
adhyātmaṃ prajahitva bāhyamapi co dharmasvabhāve sthitāḥ
śīlaskandhu viśodhito aśabalo akhaṇḍa acchidritaḥ |
no vā teṣu kadāci śīla śabalaṃ no cāpi kalmāṣatā
dvāvetau parivarjiyā matidharā budhyanti bodhiṃ śivām || 79 ||
atha khalu bhagavāṃstasyāṃ velāyāmimā gāthā abhāṣata-
ahaṃ sa pūrve caramāṇu cārikāṃ
rājā abhūvaṃ tada śūradattaḥ |
ratanāvatī nāma sa rājadhānī
udyānabhūmiryatu niṣkramāmi || 80 ||
rathābhirūḍhastada dṛṣṭva bhikṣuṃ
samantaprāsādiku darśanīyam |
dvātriṃśatā kavacitu lakṣaṇebhi -
robhāsayantaṃ daśa diśatā samantāt || 81 ||
supuṣpacandro diśatā suviśruto
hitānukampī karuṇāvihārī |
sattvānukampī nagaraṃ praviṣṭaḥ
śirīya tejena ca śobhamānaḥ || 82 ||
ahaṃ ca rūpeṇa tādṛśo'bhavaṃ
mātsaryamutpannu subhairavaṃ me |
kāmeṣu gṛddho grathitaśca rājye
mā eṣa rājyānmama cyāvayeta || 83 ||
putrāṇa saṃpūrṇa sahasra mahyaṃ
rathānurūḍhā anuyānti pṛṣṭhataḥ|
vicitramukuṭābharaṇā vibhūṣitā
yatha devaputrāstridaśendra yānti || 84 ||
duhitṝṇa tasmin śata pañca mahyaṃ
maṇipādukārūḍha sudarśanīyāḥ |
ābaddhamukuṭābharaṇā vibhūṣitā-
ste hemajālai rathu te vahanti || 85 ||
strīṇāṃ sahasrāṇi aśīti mahyaṃ
prāsādikāḥ sarva sudarśanīyāḥ |
rathādhirūḍhāḥ samudīkṣya bhikṣuṃ
prāsādikaṃ merumivodgataśriyam || 86 ||
dṛṣṭvā ca tāsāṃ pitṛsaṃjña jātā
utpāditaṃ citta varāgrabodhaye |
samādayitvā tada brahmacaryaṃ
kṣipiṃsu tānābharaṇān manoramān || 87 ||
īrṣyā mamotpanna abhūṣi tatkṣaṇaṃ
vyāpādadoṣaśca khilaṃ cā dāruṇam |
aiśvaryamattaśca vadāmi putrān
ghāteya bhikṣuṃ sthitu yaḥ purastāt || 88 ||
śrutvātha te mahya kumāra vākyaṃ
suduḥkhitā durmanaso abhūvan |
mā eva pravyāhara tāta vācaṃ
na ghātayāmo vaya bhikṣumīdṛśam || 89 ||
yadyaṅgamaṅgātu śarīra chidyet
kalpāna koṭyo yatha gaṅgavālukāḥ |
na tveva bhikṣuṃ vaya hiṃsayema
tathāhi bodhāya utpannu cittam || 90 ||
śrutvātha rājā tada putravāsyaṃ
bhṛtyaṃ bhaṇī roṣitu vadhyaghātakam |
ānetha śīghraṃ imu bhikṣu ghātayī
sthitu yaḥ purastāpi antaḥpurasya || 91 ||
athāgamī paści sa vadhyaghātako
sa raudracitto va su nandināmā |
asiṃ gṛhītvāna sa tailapāyitaṃ
yeno kṛto bhikṣuṇa aṣṭakhaṇḍaḥ || 92 ||
kṛtvā tvakarmeti sughorarūpaṃ
niryātu udyānu gatā kṣaṇena |
na tasya krīḍā na ratī ca jāyate
smaritva bhikṣuṃ tada puṣpacandram || 93 ||
sa śīghraśīghraṃ tvaramāṇarūpaḥ
tataḥ praviṣṭaḥ svaku rājadhānīm |
rathābhirūḍho gatu taṃ pradeśaṃ
yasmin kṛto bhikṣu sa aṣṭakhaṇḍam || 94 ||
aśrauṣi so ghoṣamathāntarīkṣād
bahūn devānayutāna krandatām |
kalirāja pāpaṃ subahu tvayā kṛtaṃ
cyuto gamiṣyasyasukhaṃ avīcim || 95 ||
śrutvāna rājā marutāna ghoṣaṃ
suduḥkhito durmanu trastacittaḥ |
bahū mayā dāruṇa pāpakaṃ kṛtaṃ
yeno mayā ghātitu puṣpacandraḥ || 96 ||
yaḥ putru buddhāna nararṣabhāṇāṃ
anantajñānīna tathāgatānām
guptendriyaḥ sūratu śāntamānasaḥ
so'pī mayā ghātitu kāmakāraṇāt || 97 ||
yo dharmu dhāreti tathāgatānāṃ
saddharmakośaṃ kṣayi vartamāne |
jñānapradīpaṃ kari sarvaloke
kaṣṭaṃ sa me ghātitu kāmakāraṇāt || 98 ||
yo dharma pravyāharatī prajānāṃ
gambhīra śāntaṃ nipuṇaṃ sudurdṛśam |
yo bodhimaṇḍasya varasya deśakaḥ
so'yaṃ mayā ghātitu kāmakāraṇāt || 99 ||
yo dharmakośaṃdharu nāyakānā-
mandhasya lokasya pradīpabhūtaḥ |
yo dhāraṇī dhārayi sūtrarājaṃ
sa kiṃ mayā ghātitu kāmakāraṇāt || 100 ||
asaṃkiliṣṭaḥ suviśuddhajñānī
śāntaḥ praśāntaḥ satataṃ samāhitaḥ |
kāmāndhabhūtena mayādya ghātito
yenātikaṣṭaṃ nirayaṃ gamiṣye || 101 ||
ye'tīta buddhāpyatha ye anāgatā
ye cāpi tiṣṭhanti narottamā jināḥ |
anantavarṇān guṇasāgaropamān
upaimi sarvān śaraṇaṃ kṛtāñjaliḥ || 102 ||
ghorān gamiṣye nirayāṃścyutasya
trātā na tatra pratividyate mama |
karmaṃ hyaniṣṭaṃ hi kṛtaṃ mayādya
yad ghātito'yaṃ maya dharmabhāṇakaḥ || 103 ||
dhik pāpacittaṃ vyasanasya kartṛ
dhig rājabhāvaṃ madagarvitānām |
ekaḥ prayāsyāmi vihāya sarvaṃ
sāraṃ na me kiṃcidito gṛhītam || 104 ||
viśuddhadharmo gatadoṣamohaḥ
priyaṃvadaḥ kāruṇiko jitātmā |
adūṣakaḥ sarvajanaikabandhuḥ
kasmāddhato me varapuṣpacandraḥ || 105 ||
hā suvratā kṣāntitapodhanāḍhyā
hā rūpadākṣiṇyaguṇairupetā |
hā niṣkuhā śrīghana niṣprapañcā
kuha prayāto'si vihāya mā tvam || 106 ||
adyāvagacchāmi maharṣivākyaṃ
kāmā hyanityā vadhakāḥ prajānām |
manojvarā durgatihetavaśca
tasmāt prahāsye eta kāmacaryām || 107 ||
yāsye ghoramahaṃ hyavīcinirayaṃ trāṇaṃ na me vidyate
pāpaṃ karma kṛtaṃ hyaniṣṭamasukhaṃ bhikṣurmayā ghātitaḥ |
muktvā rājya hu brahmacaryaparamaḥ pūjāṃ kariṣye varāṃ
puṣpairgandhavilepanaiḥ suruciraiḥ stūpaṃ kariṣyāmyaham || 108 ||
putrāśco duhitṝḥ striyo gṛhapatī ye cā amātyā mama
śreṣṭhī naigama kṣatriyā bahuvidhāḥ sarveṣa bhāṣāmyaham |
agaruṃ padmaku candanaṃ suruciraṃ gandhāśca ye śobhanāḥ
śīghraṃ kurvatha mañjugarbhaśibikāṃ yadbhikṣu dhmāpīyatu || 109 ||
śrutvā pārthivavākya sarvanagaraṃ gandhāṃ haritvā varāṃ
citikāṃ kṛtva manojñagandha rucirāmāropya bhikṣuṃ tahim |
agaruṃ padmaku candanaṃ satagaraṃ spṛkkāṃ tathā pāṭalāṃ
puṣpairmālyavilepanena ruciraistailena prajvālayī || 110 ||
droṇyāṃ tasya kṛtaṃ śarīramabhavad yā māpitā bhikṣubhi-
steṣāṃ stūpu karitva rāja avacī pūjāsya kāmāmyaham |
puṣpaṃ mālya vilepanaṃ ca grahiya cchatrān patākāṃ dhvajāṃ -
stasmiṃstūryasahasrakoṭinayutāṃ vādāpayī pārthivaḥ || 111 ||
traikālyaṃ divase vrajī mahipati bhikṣusya stūpaṃ tadā
triṣvapyadhvasu deśayī purīmakaṃ yatkiṃci pāpaṃ kṛtam |
varṣā koṭisahasra pañcanavatiṃ taṃ kṣepayī duṣkṛtaṃ
śīlaṃ paści akhaṇḍa rakṣitu varaṃ śuddhaṃ śucī nirmalam || 112 ||
varṣā koṭisahasra pañcanavatiṃ poṣī tadā poṣadhaṃ
bhinne co tada ātmabhāvi patito ghorāmavīciṃ punaḥ |
kṛtvā nirghṛṇa karma vedayi dukhaṃ kāmaṃnidānaṃ bahu
buddhā koṭisahasra pañcanavatiṃ vīrāgitā ye mayā || 113 ||
varṣā koṭisahasra pañcanavatī andho'hamāsaṃ tadā
dvāṣaṣṭī pi ca kalpa koṭinayutā netrā mi bhinnā purā |
naikā kalpasahasra koṭinayutāmutpāṭya cakṣurhṛtaṃ
hastā cchinna anantakalpanayutān pādāśca karṇāḥ śirāḥ || 114 ||
mānuṣye sati kalpakoṭinayutānanyāsu vā jātiṣu
duḥkhā vedana vedayāmi ca ciraṃ saṃsāraduḥkhārditaḥ |
kṛtvā pāpaku karma duḥkhanubhavī saṃsāramāṇaściraṃ
tasmāt pāpu na kuryu adhvi tribhave yo bodhimicchecchivām || 115 ||
deśetva karmaṃ purimaku rājaśreṣṭho
nāsau vimucyī purimaku duṣkṛtātaḥ |
kṛtvā ca karmaṃ purimaku ghorarupaṃ
sa ca cyavitva gacchennirayamavīci ghoram || 116 ||
hastā vicchinnāstathapi ca pāda karṇa
nāsā vicchinnā bahuvidha nantakalpān |
netrā ca mahyaṃ balaśo hṛtā kṣipitvā
utkṣipta daṇḍairvicaratu cārikāyām || 117 ||
tyaktvā svakāye śira kara bodhihetoḥ
putrāśca dārānnayana tathātmamāṃsam |
hastāṃśca pādān parityaji hṛṣṭacitto
no ca kṣapemī purimaku pāpakarma || 118 ||
rājā abhūvaṃ tada ahu śūradatto
te putra mahyaṃ carimaka dharmapālāḥ |
padmottaro'yaṃ āsi supuṣpacandro
vasunandi āsīddaśabalu śāntirājaḥ || 119 ||
si nārisaṃgho suvipula kṣatriyāśco
gṛhapatī ye balapati ye camātyāḥ |
śreṣṭhī tathaiva naigama kodṛrājā
sarve'pyabhūṣī daśabala niṣkileśāḥ || 120 ||
kumāra evācaritamanantakalpaṃ
dṛṣṭvān buddhān dhutaguṇa niṣkileśāḥ |
te te mi duḥkhā tada anubhūtapūrvā
carantu śreṣṭhāṃ ima bodhicaryām || 121 ||
yo bodhisattvaḥ pratiṣṭhita dhāraṇīye
maitrāvihārī acalitu aprakampī |
nāsau kadācid vrajati apāyabhūmiṃ
pūjetva buddhān dhutaguṇa niṣkileśān || 122 ||
yo icchi buddho kathamiha dharmasvāmī
dvātriṃśatībhiḥ kavacitu lakṣaṇebhiḥ |
so śīlarakṣī aśabala apravedhā
deśeti dharmaṃ pratiṣṭhitu dhāraṇīye || 123 ||
iti śrīsamādhirāje supuṣpacandraparivartaḥ pañcatriṃśatitaḥ || 35 ||